Home / Uncategorized / پاکستان منصوبوں سے آگاہ کرے ، ہم مکمل کرینگے ، برطانوی ہائی کمشنر
پاکستان منصوبوں سے آگاہ کرے ، ہم مکمل کرینگے ، برطانوی ہائی کمشنر

پاکستان منصوبوں سے آگاہ کرے ، ہم مکمل کرینگے ، برطانوی ہائی کمشنر

لاہور(کامرس رپورٹر)برطانیہ کے ڈپٹی ہائی کمشنر جان ٹکنوٹ نے کہاہے کہ پاکستان تیزی سے پھیلتی ہوئی بڑی مارکیٹ ہے۔ برطانوی تاجر اس کی اہمیت سے اچھی طرح آگاہ ہیں اور پاکستانی تاجروں کے ساتھ تجارت و سرمایہ کاری کے تعلقات مزید مستحکم کرنا چاہتے ہیں۔ انہوں نے ان خیالات کا اظہار لاہور چیمبر کے سینئر نائب صدر الماس حیدر اور نائب صدر ناصر سعید سے لاہور چیمبر میں ملاقات کے موقع پر کیا۔ ایگزیکٹو کمیٹی اراکین امجد علی جاوا‘ میاں عبدالرزاق‘ ڈاکٹر قراۃ العین‘ میاں زاہد جاوید اور سابق نائب صدر فیصل اقبال شیخ بھی اس موقع پر موجود تھے۔ برطانوی ڈپٹی ہائی کمشنر نے کہا کہ ہم پاکستان کے ساتھ مل کر کام کرنا چاہتے ہیں‘ ہمیں آئیڈیاز دیں‘ پراجیکٹس دیں جن کی تکمیل کے لیے ہم بھرپور تعاون کریں گے۔ انہوں نے کہا کہ کراچی میں امن و امان کے حالات میں بہت بہتری آئی ہے جو خوش آئند ہے‘ دونوں ممالک کے درمیان دیرینہ تاریخی تعلقات ہیں جنہیں مزید بامعنی بنانے کی ضرورت ہے۔ انہوں نے کہا تجارت و سرمایہ کاری کو فروغ دینے کے لیے برٹش بزنس سنٹرز قائم کرنے کی منصوبہ بندی کی جارہی ہے۔ لاہور چیمبر کے سینئر نائب صدر الماس حیدر نے کہا کہ پاکستان کاروبار کرنے کے لیے بہترین جگہ ہے‘ برطانوی تاجروں کو آگے آنا اور یہاں موجود تجارتی مواقعوں سے بھرپور فائدہ اٹھانا چاہیے۔ انہوں نے کہا کہ ایک بڑا تجارتی حصے دار ہونے کی وجہ سے پاکستان برطانیہ کو بہت اہمیت دیتا ہے۔ یہ بات خوش آئند ہے کہ دوطرفہ تجارت کا حجم بتدریج بڑھ رہا ہے۔ 2013سے 2014کے دوران باہمی تجارت کا حجم 1.98ارب ڈالر سے بڑھ کر 2.26ارب ڈالر ہوگیا جس میں مزید اضافے کی گنجائش ہے۔

لاہور چیمبر کے نائب صدر ناصر سعید نے برطانوی ڈپٹی ہائی کمشنر پر زور دیا کہ وہ پاکستان میں غیرملکی سرمایہ کاری کے فروغ کے لیے کردار ادا کریں۔ انہوں نے کہا کہ پاکستان کے بہت سے شعبوں میں برطانوی سرمایہ کاروں کے لیے وسیع مواقع ہیں جن سے انہیں بھرپور فائدہ اٹھانا چاہیے۔ انہوں نے کہا کہ لاہور چیمبر پاکستان اور برطانیہ کے تاجروں کے درمیان روابط کے فروغ کے لیے اہم کردار ادا کررہا ہے۔

Comments are closed.

Scroll To Top